فرانكواراب

بهظ بيه سألنى سِال مهم جدا النهاردة..ليه أنا ساعات بستخدم الفرنكواراب فى الكتابة..بصوا هو و الله مش الاطة و لا حاجة ب اللى انا نفسى وصله إن الواحد ممكن يقول كل اللى جواه بأى طريقة حتى و لو كان بإستخدام لغة جديدة, اه و إيه المشكلة فى ده؟؟ الإنسان هو اللى إخرع الغة علشان يعبر عن نفسه.. و دايما هيفضل دور على طريقة يقول فيها هو عايز إيه :) ده اللى أنا عايز اقوله..طبعا انا مع اتمسك بللغة العربية علشان مهما كن دى اللغة الأم..بس ساعات بحس إنها مش مساعدة اوى على انى اقول اللى نا عايزه بسهولة؟؟

أنا عايز أعرف رأيكوا فى ده إيه؟؟ و مين شايف إن حتى بإختلاف اللغة ممكن نعبر عن اللى إحنا عايزينوا...يلا مستنى ردكوا

الإسكندرية..عروس تغتصب

إسكندرية...بس اول ماتقول الكلمة دى شوف فى كام حاجة بتيجى فى دماغك....البحر, الجو اللى مايتعوضش, الناس الحلوة, الرقى فى التعامل...تقريبا كل حاجة حلوة.فعلا هى عروسة البحر المتوسط و بالنسبة لى انا بقول انها احلى عروسة فى العالم. و الدليل على كده شوفوا فى كام إسكندرية فى العالم....كتييـــــــر و كل دى تماحيك بس لو عملوا إيه إسكندريتنا هى الأصل. بس للاسف إسكندرية كانت ماشية تتمختر على شط البحر الأبيض , ممشوقة القوام, و اثقة الخطى, فجأة.......و بدون اى مقدمات طلع عليها قطاع طرق بقيادة المعلم اللى كلنا عرفينه الريس لبيب....و كم كان مستمتعا و هو يغتصب تلك العروس و يسلبها كل جمالها... و على غرار سياسة إنسف حمامك القديم..طـــــــــــــاخ صحسنا من النوم لقينا كل حاجة بايظة...مفيش و لا رصيف, الشوارع كلها مكسرة, و ياريت على كده إذ فجأة طلعت فى دماغه إنه يقلب واحد من اهم طرق إسكندرية... خالد بن الوليد ...تخيلوا كده فجاة انت او انتى نازلين الصبح و فجاة لقت ش. خالد بن الوليد اتعكس اتجاهه و طول مانت سايق الناس ماشية تهزئك و انت مش فاهم فى إيه...و طبعا قال إشمعنا خالد... يلا بينا على البكباشى العيسوى و قلبه هو كمان...إيـــــــه, مش كفاية

و كانه لم يكتفى ففتح الأبواب لكى يتمتع بحلل المحشى و الوافدين معها و هم يكملون نهش تلك الضحية البريئة... هذا العام ياتوا بغير العادة فكل عام يأتوا تكون الإسكندرية متلالاءة تستعد لهم و لكن هذا العام كان الريس لبيب قادر على ان يضعفها ويجعل كل قواها تخور امامهم...ليــــه؟؟؟ فهمنى ؟؟!!!!

الإسكندرية التى كانت إلهام الشعراء و مقصد العرائس فى شهر العسل, الإسكندرية التى غنى لها الكبار و الصغار, الإسكندرية التى حيرت العالم كله بأسرارها و سر حيويتها الدائمة, و سحرها الذى يبهر كل من يخطو أرضها...

إصمدى ياحبيبتى فسيأتى يوم ننتقم من كل من جرحكِ ياعروس متوجة يامن غنت لكى الصوت الملائكى "فيروز" : شط إسكندرية ياشط الهوى, وقالت "داليدا" عنكى : إسكندرية أحسن ناس ..عالبحر ماشية تتمختر"...

نداء من محب لتلك المدينة الخالدة ...أنقذوا حبيبتيكم لا تتركوا من لايقدرها يهتك عرضها...

ممسوك تحرى

كنت ماشي فى الشارع قابلنى كمين
وقفنى قلى رايح على فين
قلتله مروح قلى بطاقتك
قاعدت ادور مش لاقيها
شكلها ضاعت يانهار طين
قلتله نسيتها على البوكس خدنى و قمنا طلعين
وصلنا القسم ايوه قسم عابدين
كلبشونا و سابونا روحنا قاعدين
فتحوا المحضر قالولى انت مين
و قعدنا ساعة بس فى سين و جيم
بصلى و قلى شكلك بن ناس كويسين
ايه اللى جابك هنا احنا مش ناقصين
روح يابنى و بلاش كلام كتير
حمدت ربنا انى روحت سليم
قلت ده درس اتعلم منه للسنين
شيل بطاقتك و امشى فى السليم

صباح الجمال

انا قلت ابدأ بموضوع خفيف كده..إمبارح زى أى شاب بيحب الكرة و بيحب يشوف كرة جميلة, قررت انى اتابع ماتش "المانيا" و "النمسا" فى بطولة الأمم الأوربية...لحد هنا عادى, اللى مش عادى إن في بداية الماتش الكاميرا جابت مدرجات المانيا و إذ اشوف المستشارة الألمانية "ميريكل" (دى الرأس الكبيرة فى المانيا) المهم القيها قاعدة وسط الجمهور عادى جدا و ماسكة العلم و بتشجع زيها زى اى حد...عادى قلت يمكن فاضية...ببص النحية التانية لاقيت مستشار النمسا "الفريد جوسنبور" قاعد نفس القاعدة مع جماهير بلاده...إيه ده إيه الحلاوة دى...كده وسط الناس عادى جداَ....ليه الناس دى كده؟؟؟ إشمعنا...ليه مش قاعدين فى اوضة زجاج و كل الجمهور اللى حوليها من الأمن المركزى؟؟؟!!!....حد يفهمنى؟؟؟ بجد أنا مذهول, الإتنين كل واحد ماسك علم بلده و بيشجع من قلبه ....إمتى هنكون زى الناس دى إنشاء الله فى التشجيع؟؟؟!!!